Rais Ruto Aomba Msamaha kwa Tanzania na Gen Z

     Katika tukio lisilo la kawaida lakini la kuonyesha unyenyekevu wa hali ya juu, Rais wa Jamhuri ya Kenya, Dkt. William Samoei Ruto, ameomba msamaha hadharani kwa taifa jirani la Tanzania pamoja na kizazi kipya cha vijana wa Kenya, maarufu kama Gen Z. Hatua hii imekuja kufuatia mivutano ya hivi karibuni kati ya Kenya na Tanzania pamoja na malalamiko ya vijana kuhusu sera za kiuchumi.

Akihutubia Mkutano wa Kitaifa wa Maombi uliofanyika jijini Nairobi, Rais Ruto alitumia jukwaa hilo kuonesha nia ya dhati ya kurejesha mahusiano ya kindugu katika ukanda wa Afrika Mashariki.

"Kwa majirani zetu wa Tanzania, ikiwa tumekosea kwa njia yoyote, tunaomba msamaha. Tunapaswa kuwa mfano wa mshikamano, si mgawanyiko," alisema Rais Ruto mbele ya viongozi wa dini na wananchi waliokusanyika kwa maombi.

Kauli hiyo imekuja baada ya tukio lililohusisha kuachwa kwa wanaharakati wawili — Boniface Mwangi kutoka Kenya na Agather Atuhaire kutoka Uganda — waliodai kufanyiwa vitendo vya uonevu na maafisa wa usalama nchini Tanzania wakati wa kesi ya kiongozi wa upinzani, Tundu Lissu. Tukio hilo lilizua taharuki katika mitandao ya kijamii na kuibua malalamiko kutoka kwa mashirika ya haki za binadamu.

Rais Ruto pia hakusita kuwahutubia vijana wa taifa lake, ambao wamekuwa mstari wa mbele kwenye maandamano na mijadala ya mitandaoni wakipinga ongezeko la ushuru, gharama ya maisha, na ukosefu wa ajira.

"Kwa watoto wetu, Gen Z, ikiwa tumekosea popote, tunaomba msamaha. Tuko pamoja nanyi katika kujenga taifa hili. Lazima tusikilizane kwa heshima," aliongeza.

Kauli hizo zimepokelewa kwa mitazamo mseto mitandaoni, huku baadhi wakisifu unyenyekevu wake, na wengine wakitaka hatua thabiti zaidi kufuatia ombi hilo la msamaha.

Hatua ya Rais Ruto inachukuliwa kama jaribio la kurejesha imani kwa wananchi wake na kupoza mvutano wa kidiplomasia ambao ulikuwa unaelekea kuchukua sura kubwa zaidi. Wachambuzi wa siasa wanaitafsiri hotuba yake kama mwanzo mpya wa mazungumzo ya maridhiano na mshikamano wa kikanda.